![](https://terrasdomino.deputacionlugo.org/wp-content/uploads/2023/09/2018_12_28.jpeg)
Trátase da exposición A natureza, retratamos flora e fauna no Rato, que recolle imaxes feitas por escolares de entre 8 e 10 anos participantes no curso de fotografía do Goberno da Deputación. Poderase visitar de forma gratuíta ata o 21 de abril
Fernández Queipo avanzou que “esta exposición é o resultado dunha actividade que se converte nunha ferramenta de concienciación medioambiental”
O Deputado de Medio Ambiente, Argelio Fernández Queipo, participou na inauguración da exposición infantil de fotografía A natureza, retratamos flora e fauna no Rato. Trátase de 38 imaxes feitas polos escolares de idades entre 8 e 10 anos que participaron no curso de fotografía do Goberno da Deputación durante o pasado mes de xullo. A mostra poderase visitar, de forma gratuíta, ata o 21 de abril de 2019, de luns a venres, de 9:00 horas a 14:00 horas.
Fernández Queipo avanzou que “esta exposición é o resultado dunha actividade que se converte nunha ferramenta de concienciación medioambiental. É a contribución da arte á conciencia ecolóxica. Estas imaxes foron recollidas logo da observación que os nenos e nenas fixeron daquilo que os rodea”.
O Deputado subliñou que “é unha forma de reforzar o vínculo dos nosos cativos coa natureza. Os cursos de fotografía da Deputación son útiles para o descubrimento da contorna natural e cultural, que fomenta ademais o traballo en equipo. Ademais favorece que os escolares se emocionen e establezan un vínculo afectivo coa contorna, impulsando ao mesmo tempo a Reserva da Biosfera”.