– A xornada terá lugar no salón de actos do Pazo de San Marcos e reunirá a reputados expertos no estudo do cambio climático, contaminación atmosférica e aforro enerxético. Ao rematar o simposio haberá un roteiro urbano pola cidade de Lugo
– Paralelamente, continúa aberta ata o sábado 24 de marzo, a exposición sobre o cambio climático e a enerxía, organizada polo Goberno da Deputación e ADEGA
– Estas accións enmárcanse na iniciativa global A Hora do Planeta, que se celebra mundialmente o último sábado de marzo de cada ano e consiste nun apagamento eléctrico voluntario durante unha hora ao que tamén se suma a Deputación
O Goberno da Deputación promove mañá unha xornada sobre enerxía e clima aberta ao público e totalmente de balde, enmarcada na iniciativa global A Hora do Planeta, que se celebra mundialmente o último sábado de marzo de cada ano e consiste nun apagamento eléctrico voluntario durante unha hora ao que tamén se suma a Deputación. A xornada terá lugar en horario de mañá e tarde e reunirá reputados expertos no estudo do cambio climático, a contaminación atmosférica e lumínica, así como o aforro enerxético.
Deste xeito, entre os poñentes atópanse: Pablo Ramil, director do IBADER e experto do panel científico galego contra o cambio climático; Ramón Varela Díaz, experto en contaminación atmosférica; Xoán Doldán, da USC; Adrián Dios Vicente, da USC; Pablo Álvarez Fernández, da Cooperativa Nosa Enerxía; e Fins Eirexas, de ADEGA. Como clausura para a xornada haberá un roteiro vespertino urbano pola cidade de Lugo para avaliar a contaminación lumínica e a problemática da iluminación exterior.
Programa da xornada Enerxía e clima – A hora do planeta
Mañá (10.30 -14.00 Horas)
– 10:30 Horas. Benvida institucional e contextualización.
– 10.45 Horas. O cambio climático: impactos e previsións. Pablo Ramil, director do IBADER e experto/a do panel científico galego contra o cambio climático.
– 11:30 Horas. Debate
– 11.45 Horas. Pausa Café
– 12.00 Horas. A contaminación das fontes de xeración enerxética. Ramón Varela Díaz, experto en contaminación atmosférica.
– 12.45 Horas. Crise enerxética e decrecemento no marco dos acordos de París. Xoán Doldán, USC.
– 13:30 Horas. Debate.
Tarde (16.30 -19.00 Horas)
– 16:30 Horas. O modelo enerxético ga/ego. Adrián Dios Vicente, USC.
– 17:15 Horas. A factura eléctrica: aforro e eficiencia no fogar. Pablo Álvarez Fernández, Coop. Nosa Enerxía.
– 18:00 Horas. A problemática da contaminación lumínica. Fins Eirexas, ADEGA
– 18:45 Horas. Debate.
– Roteiro vespertino urbano pola cidade de Lugo (20.00 a 22.00 Horas) para avaliar a contaminación lumínica e a problemática da iluminación exterior.
Exposición sobre o cambio climático
Paralelamente, continúa aberta ata o vindeiro sábado 24 de marzo, a exposición sobre o cambio climático e a enerxía, organizada polo Goberno da Deputación coa colaboración de ADEGA composta por 13 paneis. Esta exposición nace do Proxecto Europeo de Acción Educativa polo Clima, Clarity, para contribuír ao coñecemento do fenómeno do cambio climático, as súas causas e as respostas que se poden artellar para facerlle fronte, tanto por parte das institucións e das empresas, como pola da cidadanía. Nos paneis repásanse as causas e consecuencias do cambio climático, e como este fenómeno afecta aos ecosistemas e á sociedade. Unha parte importante da mostra traballa as accións e actitudes positivas que debe emprender a cidadanía para mitigar os efectos do quecemento global, e como tamén os Gobernos, Concellos e ONGs poden contribuír.
A mostra permanecerá aberta até o vindeiro sábado 24 de marzo, data na que centos de cidades de todo o planeta apagarán a iluminación dos principais monumentos públicos entre as 20:30 e as 21:30 horas. A Deputación de Lugo tamén se une a esta iniciativa denominada A Hora do Planeta.
A Hora do Planeta
A Hora do Planeta celébrase o último sábado do mes de marzo de cada ano e consiste nun apagamento eléctrico voluntario, no que se pide a fogares, empresas, institucións e demais edificios que apaguen as luces e outros aparellos eléctricos non indispensables durante unha hora. Con esta acción simbólica, preténdese concienciar á sociedade sobre a necesidade de adoptar medidas fronte ao cambio climático e as emisións contaminantes, así como aforrar enerxía e minorar a contaminación lumínica.